20. Illi timuit peccare, cuius erat famulus,
qui clementer eum sua circumcincxit gracia.
Pharaoni indicauit septem leta tempora,
septem tristia predixit post haec redeuntia.
21. Nam cum inter multos esset damnatos in carcere,
Pharaonis uinifusor Ioseph refert somnium:
“Tres propagines florentes, tres uuas sub pampino
uidi pendere in uisum, pulchris cinctas gemmulis.
22. His expressis Pharaoni aureo in poculo
obtuli bibendum: “Ioseph dixit: “Haec est somnii
huius imago: tres dies tres designant palmites;
post tres dies honor tibi gradus datur pristini.
23. Cum feliciter hoc modo bene tibi fuerit,
memor mei Pharaoni, obsecro, ut suggeras,
quia furtim sum sublatus et hic absque crimine
innocens in lacum missus. testem deum habeo.”
24. Post haec somnium Pharao uidit difficillimum.
Nullus erat qui obscura interpres ediceret.
Tunc pincerna, recordatus Ioseph, regi retulit,
qualiter sibi futura prospera predixerit.
25. Tunc iubente rege Joseph abstractus de carcere
stetit ante Pharaonem anno in tricesimo,
postquam sui eum fratres uiginti argenteis
uendiderunt Putifares magistro miliciae.
|
|