LIBER V.
Cap. I.
Commissio vicariae cum gladii potestate.
Ad extollenda justorum praeconia,
et reprimendas insolentias transgressorum,
prospiciens de coelo justitia
erexit in populis regnantium solia, et
diversorum principum potestates. Caruisset
namque libenter humana conditio jugo dominii,
nec libertarem a se, quam eis natura donaverat
homines abdicassent, nisi quod impunita
licentia scelerum, in evidentem perniciem
humani generis redundabat, et sic necessitate
quadam oportuit nostram subesse justitiae
et servire judicio libertatem. Sed nec extrinsecus
exquiri decuit speciem aliam creaturae,
cui se repraesentata per hominem coelestis imago
subjiceret: sed homo praelatus est homini,
ut gratiorem praelaturam efficeret identitas speciei.
Potissime tamen divina sententia praefecit
ad regimen populorum Imperium, dum
ostensa sibi figura numismatis in redditione
census, ac solutionibus tributorum, prae caeteris
regibus Caesareae fortunae fastigium praesignivit.
Cui diversimodas subdidit nationes,