sapienciam vestram quatenus, gracia et honore nostri ac nostris
intervenientibus partibus, benigno corde oblatum regimen acceptetis,
quod vestre magnitudini placeat responsiva nobis epistola declarare.
2. Responsiva, quod acceptat
Affectuosa dileccio, que vice mutua pariter nostros aggregavit affectus,
nos semper cogit exercere que cupitis, dum votis nostris potencia
persuadet. Eo igitur cupientes nos servire pro posse, honorabilis civitatis
vestre dominium, licet insufficientes ad illud, Christi nomine invocato,
iocundo animo acceptamus et hilari, parati facere integraliter
et servare per totum quod vestri constituti capitula nobis mandarunt.
3. Responsiva alia, quod non acceptat
Considerato quod a primo parente natura hominibus provenit indifferens,
nulla maior oblacio fieri potest in seculo, quam cum homo se
homini subicit ac sibi preponit in dominum quem nulla natura constituit
coequalem. Ex eo itaque quod a providencia venit nos nuper
eligere in vestrum potestatem et dominum ad honores et commoda terre
vestre, nos cum omnibus nostre prolis nunc viventibus et processuris
perpetui tenere volumus realiter et personaliter, et astringi. Sed, cum
plura sint nobis oppida, que nobis marchio Estensis minatur auferre,
ad quorum proteccionem continua sollicitudine invigilare nos oportet,
vestre civitatis regimen, quod nobis liberaliter obtulistis, iuxta quod
cupitis, acceptare non possumus.
Aliter sic: Vobis regraciantes uberius quam lingua posset exprimere,
nobilitatem vestram precamur quatenus nos velitis in hac parte
excusacionis recipere, si effectus operum cordiali affectui adiungi
nequit.
4. De civitate ad civitatem pro cive derobato
Querula nobis exposicione monstrante talis castellani nostri, percepimus
quod, dum ipse per presentem hebdomada per vestram sortitam
iurisdiccionem transitum faceret prope talem silvam districtus vestri,
invasus fuit a quibusdam predonibus tunc ibi latentibus et hiantibus
innocencium sanguinem deglutire, qui, ablato sibi suo ronsino et
una vellisia plena pannis, trucidassent ipsum gladio, nisi astans vicina,
que vilis, excitata rumoribus, accurrisset. Quapropter amiciciam vestram
requirimus attente precantes quatenus super tam horrido et enormi
facinore dignemini taliter vestram exhibere potenciam quod, facta
de predictis restitucione nostrati, facinorosi depredatores et impii dignis
patibulis crucientur.
|
|