Quis vero preclare huius urbis miranda edificia; quis fontium
passim ebullientium suavissimam ubertatem; quis semper virentium
arborum amenitatem aut aqueductus civium habundanter
usibus servientes satis mirari sufficiat? Quis insolite planitiei gloriam
que inter urbis menia montesque quatuor fere milibus patet
laude congrua prosequatur? O beatam cunctisque seculis predicandam
planitiem, que intra gremium suum arborum fructuumque
genus omne conclusit, que quicquid usquam est deliciarum sola
pretendit, que voluptarie visionis illecebres cunctas sic allicit ut
cui semel eam videre contigerit, vix unquam ab ea quibuslibet
possit blandimentis avelli! Illic enim mireris vineas tam fecundi
cespitis ubertate quam preclari germinis generositate gaudentes;
illic hortos aspicias mirabili fructuum varietate laudandos turresque
ad hortorum custodiam et voluptatis opera preparatas, ubi et rote
volubilis obsequio descendentibus itemque adscendentibus urceolis
puteos videas exhauriri cisternasque adiacentes impleri, et inde
aquam per rivulos ad loca singula derivari ut irrigatis areolis
vegetent, et crescant citruli angusta brevitate contracti, et cucumeres
tractu longiore producti melonesque ad formam magis sphericam
accedentes, et cucurbite per arundines connexas latius evagantes.
Hinc si convertas oculos ad diversas arborum species,
videbis mala punica vel acetosa vel dulcia granis interius occultatis,
|
1
5
10
15
20
|