Pag 312

ac uitam puram ducimus et deorum culturam penitus euitamus.
Peccata non committimus, nec ultra uolumus, nisi quod racio
narrare requirit. Omnia patimur et omnia sustinemus, et apud
nos id dicimus esse opportunum, quod superfluum non probatur.
Terras nostras non apertamus, in ipsis semina non mittimus.
Boues currui non iungimus, recia in mari ad capiendos pisces
non mittimus. Venaciones aliquas quadrupedum aut auium non
facimus. Nichil ad manducandum querimus, nisi quod terra
sine hominis labore producit. Hiis cibis implemus mensas nostras
et corpora sustentamus, que nobis lesionem non inferunt. Ventres
nostros cibariis non implemus. Nam illicita est apud nos extensio
uentris. Imo absque morbo sumus. Et dum uiuimus,
semper fruimur corporum sanitate. Nullam nobis medicinam
facimus. Nullum adiutorium pro nostrorum sanitate corporum
querimus. Vno termino mortis uita nostra finitur, quia unus
non plus altero uiuit, sed secundum ordinem natiuitatis cuiuslibet
terminus mortis superuenit. Ad ignem propter frigus non
sedemus. Nullum estum corpora nostra senciunt. Semper nudis
corporibus ambulamus. Corporis desideria non facimus, omnia
per sapienciam supportamus. Omnes inimicos nostros interiores
occidimus et exteriores nullatenus timemus; leuius enim capitur
ciuitas, cum ab interioribus et exterioribus hostibus impugnatur.
Tu autem imperator, cum exterioribus pugnas. Securi semper
uiuimus, in terra siue in mari nullum adiutorium postulamus.
Corpora nostra frondibus arborum, quorum fructus edimus,
sunt cooperta. Aquam Thebeboni fluminis bibimus et gustamus.
Vnum solum deum altissimum colimus sibique laudes assidue
predicamus. Vitam futuri seculi concupiscimus. Rem aliquam,
que utilitate caret, nullatenus affectamus. Non multum loquimur,
et cum ad loquelam promouemur, ueritatem dicimus et continuo
tacemus. Diuicias non amamus. Inter nos nullus liuor et
nulla inuidia dominatur. Nullus forcior altero reperitur. Ex
paupertate, quam habemus, diuites sumus, quia omnes illam
communiter supportamus. Litem non facimus, nec arma corporalia
occupamus; pacem semper ex consuetudine retinemus.
Iudicia non habemus, quia malum non facimus, unde ad iudicium
conuocemur. Vna lex contraria nostra nature est. Miseriam
non facimus, eo quod nulla mala committimus, quod miseriam
consequi mereamur. Nullum laborem, qui auaricie pertineat,
sustinemus. Membra nostra libidini non tradimus. Adulterium
non committimus, nec aliquod uicium facimus, quia, quod rectum
est, facimus et omnes tractamus. Vnde ad penitenciam retrahamur
de factis nostris non querimus. Subitaneam mortem non
facimus, quia per sordida facta ipsum aerem non fedamus. Aer
noster nullatenus est corruptus. Nullum uestimentum in uarios
colores tingimus. Femine nostre non ornantur, ut placeant, et
cum ipsis non causa libidinis, sed pro creando sobolem commiscemur.