Cuius declinationis? Tertiae. Quae est agnitio tertiae declinationis?
Haec est: cuius genitivus singularis in is correptam desinit (excepto
vis), dativus in i productam, accusativus in em correptam vel
in en productam, vocativus similis est nominativo, ablativus in e (excepto
fame) correptam vel in i productam, nominativus accusativus
et vocativus plurales in es productam (nisi sint neutra, quae faciunt
in a brevem), genitivus pluralis in um vel in ium correptam, dativus
et ablativus in bus correptam.
Nominativo hic et haec fortis et hoc forte, genitivo huius fortis,
dativo huic forti, accusativo hunc et hanc fortem et hoc forte, vocativo
o fortis et o forte, ablativo ab hoc et ab hac et ab hoc forte vel forti;
et pluraliter nominativo hi et hae fortes et haec fortia, genitivo horum
et harum et horum fortium, dativo his fortibus, accusativo hos et has
fortes et haec fortia, vocativo o fortes et o fortia, ablativo ab his
fortibus.
Quarta declinatio
Nominativo haec manus, genitivo huius manus, dativo huic manui,
accusativo hanc manum, vocativo o manus, ablativo ab hac manu;
et pluraliter nominativo hae manus, genitivo harum manuum, dativo
his manibus, accusativo has manus, vocativo o manus, ablativo
ab his manibus.
Cuius declinationis? Quartae. Quae est agnitio quartae declinationis?
Haec est: cuius genitivus singularis, nominativus accusativus et
vocativus plurales in us productam desinunt, dativus singularis in ui
productam, accusativus in um correptam, vocativus similis est nominativo,
ablativus in u productam, genitivus pluralis in <u>um correptam,
dativus et ablativus in bus correptam.
Tria tamen causa differentiae in ubus terminant, ut partus partubus
(per differentiam pars partis partibus), artus artubus (ad differentiam
ars artis artibus), arcus arcubus (pro differentia arx arcis arcibus).
| Alia quoque sola auctoritate in ubus faciunt, ut acus acubus, lacus
lacubus, specu<s> specubus, et si qua sunt huiusmodi.
|
|