et sanior pars cardinalium Gregorium natione Romanum diaconum cardinalem sancti Angeli in
pontificem elegerunt qui et Innocentius secundus est appellatus. Alia uero pars cardinalium
Petrum filium Petri Leonis nobilem ciuem Romanum diaconum cardinalem sancti Nicolai de
Carcere in pontificem leuauerunt, qui ab eis Anacletus est appellatus. Hic autem parentum
suorum quorum habebat copiam, auxilio et fortitudine pene totam Urbem suo dominio subdidit.
Innocentius uero Fragentium-panem usus consilio et auxilio, cum in Urbe morari non posset,
priuatim per Tyberim in mare descendens cum galea Pisanorum Pisas uenit et a Pisanis
honorifice susceptus est; et in ea ciuitate aliquantulum commoratus sollempne ibidem concilium
celebrauit. Dehinc in Galliam uenit et a Ludouico rege Francie et tota occidentali
ecclesia est receptus. Anacletus uero Urbis dominio potitus nuntium ad Roggerium regem
Sicilie misit. A quo et receptus est. Cuius auctoritate Apuliam intrauit et apud Melfiam
concilium celebrauit. Qui cum per nuntios suos prephatum regem sepe rogasset ut cum
eo haberet colloquium et ei de more hominium faceret, ipse utpote uir astutus et sapiens et
precauens in futurum ab eius se colloquio et aspectu subtraxit. Anacletus autem aliquandiu
in Apulia commoratus Romam rediit et ibi usque ad uite sue terminum mansit. Interea
Robbertus Capuanus princeps et Raydulfus comes Ayrole cum aliis comitibus et baronibus
Apulie regi Roggerio sunt rebelles effecti. Quo cognito rex Roggerius congregato
nauali exercitu et magna multitudine militum et peditum Salernum uenit et apud Scafatim
fluuium in territorio Nucerie cum Robberto Capuano principe et Raydulfo comite pugnauit
et deuictus est. Qui fugiens Salernum se recepit. Postmodum uero resumptis uiribus iterum
|
|