devotius obsequatur. Quocirca tibi praecipiendo
mandamus, quatenus eidem magistro G.
licentiam tribuas ad propria libere redeundi.
Cap. VII.
Magister Petrus de Vineis, cuidam de reditu
suo ad Curiam.
Praeteriti laboris angustias, quas patientibus
nobis hactenus invida Roma
suaserat, cum variae voluntates Imperio
semper varientur, et actus Viterbiensis nequitia
suggerente periculum, et laborem
de alpibus Lombardiae de novo gustavimus:
quibus divina Clementia, quae fessis dat requiem,
licet ipsos per regni refrigerium crederemus
reprimere, superatis, ad Curiam
prosper reditus nos reduxit incolumes. Ubi de
nostris renovari successibus expectamus.
Cap. VIII.
Ezelino, respondens super his quae sibi scripserat,
ut ad eum mature veniret.
Si casum et causam tuae quaestionis discutimus,
satis abbreviari posset invectio,
quam in nos de non scripta tibi dudum,
ut asseris, novae victoriae jucunditate componis.