«post dies illos, dicit Dominus, dabo legem meam, in visceribus populi
mei, et in corde eorum scribam eam; et ero eis in Deum et ipsi
erunt mihi in populum, et non docebit ultra quis proximum suum,
et vir fratrem suum, dicens: cognosce Dominum, omnes enim cognoscent
me, a minimo usque ad maximum, ait Dominus: quia propitius
ero peccatis eorum et peccati eorum non ero memor amplius»,
restat ut in sequenti nocturno, in quo conversus erit Israel, ab utroque
populo cantetur alleluia, pro omnibus bonis que facturus est
Dominus in diebus illis, propter omni consolatione, qua consolabitur
electos suos expleto primo nocturno, in quo transeunt et «pertranseunt
omnes bestie silve».
21. Porro in diebus dominicis, in tribus vigiliis distinguitur
divinum Officium, secundum quod omnibus notum est. Sex primi
psalmi qui precedunt sex tempora primi status, in quibus sex
signacula peracta sunt, immo, ipsa sex signacula libri qui in
enigmate scripta sunt prenotant, in quibus quedam verba notoria,
velut antiphone quedam, a prophetis prolate sunt, ut est: «non
auferetur sceptrum de Iuda» et; «sedes tua Deus in seculum seculi:
virga Dei virga regni tui Dilexisti iustitiam et odisti iniquitatem:
propterea unxit te Deus Deus tuus», et; «ecce virgo concipiet»,
et his similia. Licet enim diversa et obscura sint que
dicuntur in psalmis, is tamen qui antiphonam inchoat, id quod in
eis lucidius est proferre nititur, ut quo tendat in toto impetus
spiritus, per brevem et apertam antiphonam, enodatius intelligi
possit. Sic et sancti prophete verba quedam manifesta dederunt
de his que complenda erant in temporibus istis, in quibus esset
innitendum, ut per pauca que tam lucide prolata sunt, etiam obscura
queque intelligi potuissent. Quia vero sedes Dei, que est
civitas Ierusalem, ab illo rege edificata est, qui composuit psalmos
referens laudes Domino per evasiones suas, iuxta illud quod
scriptum est in libro Iob, «in sex tribulationibus liberabit te»,
merito ille ystorie, que proprie pertinent ad Ierusalem, in sex
psalmis, qui cantantur cum antiphonis, designate sunt, quia in
illis sex laboribus Iudeorum, sex labores Ecclesie figurantur in
quibus semper caveri oportebat ruinam. Versus, qui psalmos
sequitur, ipsa est tuba septimi mensis, hoc est, predicatio Johannis
|
|