nonnumquam lacertis adductis in gyrum, vibrando
lanceas compellebant hastas ocius volare
per auras, quandoque hostium obviantium transfigentes
praecordia fixo scuto. Sicque, dum hujusmodi
per diversa camporum loca geruntur, omnis
multitudo pugnantium frementibus cedit Hispanis,
et aliis de prima acie supradicta. Provinciales
autem, et globus eorum, quos nequaquam
attingere potuit gladius inimicus, fugam
quantum poterant celerabant, alii per silvas, aliique
per montes, alii ad nota, nonnulli per ignota
et devia fugientes: et dum quidam extranea
petunt divortia, ii per silentia loca errant; illos
nigra salvat horriditas; alios incalcata semita
calles devehit per occultos; nonnullos vero per
ignotam viarum regionem pavor obduxit. Verum,
si convertant se aliquantum fugientes, dum
densitatem insequentium conspiciunt, retrocedunt
frequenter, actores vulnerum, propter manuum
spissitudinem, non videntes. Fugiens, inquam,
Jacobus de Gaucelmo Aquilae substitit, et
alii per loca diversa excedentes a castris, tuta
capessunt receptacula, si qua possunt, plenaque
vasis argenteis, armis, tapetibus, et rebus decoris
innumeris tentoria Theutonicis derelinquunt.
Omni ergo Corradini exercitu per apertos campos
effuso, per castra pavida fama volavit quod,
primatibus exercitus regis Karoli una caede peremtis,
rex ipse Karolus captus erat. Tunc enim
marescalcus suus erat manibus hostium interceptus,
qui sub eisdem regis armaturis eximias .....
induebat, quem Corradinus contra honestos mores
pugnantium, qui prostratis et captis sibi invicem
parcere didicerunt, de comitum lombardorum
consilio, infra septa castrorum fecit, durante
certamine, capite mutilari. Ex quo verisimilis
fama resultans, faciles aures mendacio replevit,
immo ut publicum et notorium deferebat
quod rex capite fuerat mutilatus. His et aliis
vane replentur castra mendaciis: ingentique caede
peracta, Corradinides.....quaesitis spoliis, et
tamquam victores spoliis gratulantur et praeda.
Cap. XI
Gallis clade perterritis Erardus de Valeri animos addit.
Karolo eadem hortante, ad pugnam paratos
omnes se offerunt.
Verum legione quasi tota Germanorum sub
triumpho campis castrametante, staretque hujusmodi
concertatione sopita peditum multitudo hastis
in medio castrorum et campi longis annixa,
quibusdam nihilominus, qui fuerant per plana
diffusi, castra repetentibus hostium propter robam,
quidam immani corpore miles, nomine Erardus
de Valeri, latos habens humeros et membra
nervis compacta fortissimis, caput in altum extulit
circum colles, regique proloquitur, et electos,
quos collium occultabat curvitas, non exclusit.
Ait enim: "Nunc videndum est nostra si fortis sit
|
|