Arialdus vobis repraesentandus advenit >> . His auditis, omnes certatim advolant
crediturque beatior qui ad currendum promptior erat. Tandem,
cunctis expectantibus, sacrum corpus per Ticinum ad litus proiectum est.
Eo itaque levato in feretro, summa gloria magnisque sollemnitatibus versus
urbem defertur. Exibant rurales viri de castellis in quibus se, exercitus
timore, concluserant, victualia portantes, et cum crucibus ac cereis Deo
laudes decantabant et, ut saltem ipsum viderent, arbores ascendebant.
70. In quodam vico rusticus erat longa paralysi dissolutus, qui cum audisset
quod Christi martyr per viam duceretur, ad feretrum se portari fecit,
tactoque corpore subito est sanatus. Quod universus populus cernens, tanto
clamore in laudes Dei et martyris exultavit, ut a locis maxime distantibus
audiretur.
71. Mediolano tandem appropinquantes totam urbem obviam habuerunt,
totusque clerus affuit cum cereis cantans officium non mortuorum,
sed martyris novi, quin immo aemuli sui in hoc se sic gratos praebuerunt,
ut una cum aliis clericis novum martyrem decantarent: quod non parvum
martyris miraculum cunctis visum est. Sicque in die sancto ascensionis Domini
in medio ecclesiae sancti Ambrosii feretrum cum corpore imposito
positum est.
72. Tunc Herlembaldus pulpitum ascendens ita locutus est: << Dilectissimi,
videmus quantum valuit fides quam inter nos decem annis praedicavit
beatus Arialdus. Certe ipsum servavit incolumem in profundo lacus inter
innumerabiles immanesque pisces per decem menses, consuloque, ut
eius sanctitas magis ac magis appareat, per hos decem dies aestivos corpus
eius non tumulari. Sicque populus concurrens novi martyris sanctitate laetabitur >> .
E contra daemonia clamabant: << Interimemus te, sicut et socium
tuum >> .
|
|