celum et terram, et quae sunt in eis. Nam deos, quos iubes me
adorare, non sunt dii, sed sunt demonia, et ideo non licet michi
adorare eos, quia Christiana sum». Preses dixit: «Accede igitur
et sacrifica Christo tuo». Seraphia respondit: «Ego cotidie illi
offero sacrificia adorans illum et deprecans die ac nocte». Preses
dixit: «Et ubi est templum Christi tui, uel quod sacrificium illi
offers?». Serapia respondit: «Vt me ipsam mundam exhibeam
per castam conuersationem, et ut alios adducam ad illam professionem
per ipsius misericordiam». Preses dixit: «Hoc est templum
Dei et sacrificium Christi tui?». Serapia dixit: «Maius nichil est
quam uerum Deum cognoscere et pie uiuere et illi seruire». Preses
dixit: «Ergo tu es ipsa templum Dei tui, ut dicis». Seraphia
respondit: «Si, ipso iuuante, munda permansero, illius sum templum;
sic enim dicit Diuina Scriptura: “Vos estis templum Dei uiui
et Spiritus Dei habitat in uobis”». Preses dixit: «Si ergo uiolata
fueris, desinis esse templum Dei tui». Seraphia respondit: «Dicit
Scriptura Diuina: “Si quis templum Dei uiolauerit, disperdet illum
Deus”».
Preses autem peccatum ignorans, iussit duobus iuuenibus lasciuis
Egyptiis eam tradi, ut eam per integram noctem uterentur:
|
|