XV. De uulpe et coruo.
Vulpe gerente famem, coruum gerit arbor et escam
Ore gerens coruus, uulpe loquente, silet.
«Corue, decore decens, cignum candore perequas;
Si cantu placeas, plus aue quaque places».
Credit auis picteque placent preludia lingue;
Dum canit ut placeat, caseus ore cadit.
Hoc fruitur uulpes, insurgunt tedia coruo;
Asperat in medio damna dolore pudor.
Fellitum patitur risum, quem mellit inanis
Gloria; uera parit tedia falsus honor.
|
|