Que fuerat fedo commaculata luto.
<Paulinus, Fulco >
Qua tersa, Paulinus adest, quem Fulco recepit
Ore satis placido, non velut ante tamen:
Cuius non vultum mutavit causa sinistra;
Intimus affectus sepius ore latet.
Corde licet doleat, risum simulavit in ore;
Non veniens animo, risus inanis erit.
Tunc Paulinus ait: "Michi que narrare volebas,
Obsecro te dulci pectore, Fulco, refer!
Vera tamen referas, illudere tu michi noli:
Illudens aliis sepe relusus abit;
Fallitur interdum qui fallere cogitat, atque
In laqueos proprios quos parat ipse cadit.
Sermo tuus verax, tua verba fidelia sunto!
Tolle fidem: vacui corporis umbra sumus.
Quis bonus absque fide? Sapiens est quis sine sensu?
Est homo vas vacuum, deficiente fide;
Virtutes alias frustra conaris habere,
Si virtus fidei deficit una tibi;
Quamvis virtutum videaris egens aliarum,
Hac tamen imbutus, omnibus aptus eris;
Dat salvum te pura fides, victoria mundi
|
|