XLIV.
De nominibus principum premittendis.
Nota quod nomen pape semper premittitur, sive scribat
aut scribatur ei; et nomen imperatoris eodem modo, nisi scribat
domino pape. Hoc modo scribitur domino pape: «Sanctissimo
patri domino G. Dei gratia summo pontifici, B. illustris
rex vel regina Francie, comitissa Campanie» vel «talis
comes» seu «princeps, dux» vel «baro» vel «talis sanctimonialis
virgo Deo dicata» vel «vidua, totius devotionis affectum»
vel «talis patriarcha, archiepiscopus, episcopus» vel
«prelatus» vel «abbatissa et conventus monialium Sancti
Vitalis Bononie», vel «A. potestas et consilium ac populus
civitatis Bononie», vel «consules et universitas campsorum,» vel
«mercatorum» vel «doctores et magistri, et tota universitas
scholarium» vel «prepositus et totus clerus civitatis Bononie,
pedum obscula beatorum» vel «feliciter Petri naviculam in
maris fluctibus gubernare».
XLV.
Quomodo scribit imperator domino pape vel aliis personis.
«Sanctissimo patri et domino Gregorio Dei gratia summo
pontifici, F. eadem gratia Romanorum imperator et semper
augustus salutem et omnimodam reverentiam». Aliis omnibus
a domino papa dicit «gratiam suam et bonam voluntatem»
vel «salutem et omne bonum». Aliis personis sic
scribit: «F. Dei gratia Romanorum imperator et semper augustus,
Iherosolime et Sicilie rex, speciali amico D. eadem gratia
Ostiensi episcopo» vel «amico carissimo et fideli P. eadem
gratia episcopo Cremonensi salutem et amorem»; et sic scribit
omnibus de regno.
|
|