auribus perciperetur, virtus quoque maxima amoris et sapientie sentiretur,
nichil profecto aliud, quam quod fide et spe tenemus, designat. Nam quid aliud
retinet fides nostra, quam ut credamus baptizatos in Christo mortificatos esse
peccato, resuscitatos iustitie in forma passionis et resurrectionis dominice darique
spiritum sanctum omnibus catholice baptizatis? Recipimus ergo nunc spiritum
sanctum per manus impositionem eorum, qui receperunt in apostolis in
die pasche, in remissionem peccatorum, in futuro autem illum ad gloriam et
felicitatem secundum munerum suorum plenitudinem virtutemque speramus.
At preteriti testamenti opera litterales nobis historie viva voce commendant,
nimirum ut radix nostre fidei solido fundamento consistat; gesta vero novi
testamenti adhuc futura erant, quando Christus venit in mundum, et quia historice
necdum scribi poterant, in libro apocalipsis verbis sunt propheticis coartata,
ut disceret iuvenilis etas volando sibi cum hirundine escam accipere spiritualem
et iamiam verba historica sapientia carnem, acsi morticinum, confutare.
Sane in futuro non solum verba historica, et que terram sapere videntur, deficient,
verum etiam et verba mistica, que per figuras et enigmata prudentibus
ingeruntur, cessabunt, quia non iam per figuras aliquas, sed in spiritu dei nostri
faciem videbimus conditoris, similes eidem effecti, dicente Iohanne: Scimus
quia, cum apparuerit, similes ei erimus, quia videbimus eum sicuti est.
Verum hec idcirco dicimus, ut libri apocalipsis materiam intimare possimus
et, que sit intentio operis, enodare. Facile enim est deo postulantibus que petuntur
impendere, dummodo cause fides precedat. Nisi enim in loco aliquo esse
existimetur thesaurus, mens refugit fodere et cassis hinc laboribus fatigari.
[2.] Nunc igitur considerare est cursum preteritorum temporum, quibus
veteris testamenti opera sacro sunt signata volumine, ut huius quoque etatis
sexte, que totam in se continet novi plenitudinem testamenti, distincte intelligere
valeamus et, qualiter singulis apocalipsis partibus tempora deputentur propria,
primo quidem simpliciter promere, deinde auctore Christo auctoritatibus
idoneis comprobare.
Solempne est in ecclesia sex esse tantummodo mundi etates, secundum
quod sex diebus cuncta sua opera fecit deus. Nam septima non in opere est, sed
data est quiescentibus animabus. Nunc igitur in opere sex sunt mundi etates,
|
|