49. Nihil obstat, si per duas has beatas feminas
duo quoque testamenta uolumus exprimere,
uetus scilicet ac nouum. Vtrorumque series
Iesum diligit et orat humano pro genere.
50. Quod si cuncta peruolantes summatim theoricas
replicemus et succincte tangamus moraliter
singula, quae sunt per stilum promulgata tropicum,
possumus haec conpetenter aliter intellegi.
51. Potest Lazari per mortem peccatoris anima
unaquaeque designari, quae cordis in speleo
sub peccato consopita quasi superpositum
portat lapidem, qui mentis ostendit duritiam.
52. Haec introrsus dumque furtim latet obstinaciter
nec se foras confitendum desperata prodidit,
foetet graui sauciata peccati putredine,
quam respectu pietatis Iesus bonus suscitat.
53. Quid est dicere nam Iesum “Veni foras, Lazare”
nisi hoc, quod in peccati iam dimersum baratrum
uocat pius peccatorem mox per donum gratiae,
ut se uiuus foras prodat confitendum crimina.
54. Cuius carae sunt sorores spes et fides gemine.
Martha fidei ostentat typum, cui dicitur:
“Si credideris, uidebis, Martha, dei gloriam.”
Spei formulam Maria certo tenet pectore.
55. Non arguitur Maria de tepore fidei
sed ut uenit, ueneranter adorato domino,
meruit salutem suis adipisci precibus,
quia spes effectum capit, si non est ambigua.
|
|