Pag 1995

iurare dicebant veteres, quasi per tristitiam gloriosis
adversam.
STRIMON palus Thracie.
SVEVIA palus est Germanie magnitudine inclita.
 
TYRACA Sycilie palus est proxima Syracusis.
TRITON palus est Affrice supra sinum Syrtium, haud longe
ab aris Philenorum, vasta marginum amplitudine circundata,
ex Tritone flumine edita, quem ipsa a meridie venientem suscipit,
et ab eo denominata est. Celebris quidem plurimum est
apparitione Minerve textricis, quam apud eam primum in terris
visam aiunt eamque Tritoniam a palude nuncupatam arbitrati
sunt, penes quam diu veteres, ludicris virginum inter se
decertantium annis singulis ea in die in qua primo visa est tanquam
natalem sibi celebrantes, fidem fabule fecere.
TRITON palus est altera a superiori in Thracia, forsan a Tritone
Dardaniorum flumine derivata, in qua, aiunt, si quis se
merserit vertitur in avem.
 
VELIA palus est Ytalie apud Calabros non longe a Palinuro,
Elia olim dicta, et ab ea Elia civitas ei superapposita. Verum
addita V et palus et civitas Velia dicta est.
VOLSCARUM stagna sunt Gallie inter Rhodani hostia et Ledum
flumen.