Pag 136

Vicia, peccata et mala dicuntur in Deo esse c.89r.a
Rubrica XXXIX
Diximus in precedenti c. vicia et peccata inesse dyabolo.
Nunc, gracia exercicii, conemur ipsa ostendere in Deo esse,
et arguo sic: Deus cognoscit mala, vicia et peccata, ergo
mala, vicia et peccata sunt in eo. Antecedens est notum:
quia ipse punit et reprobat omne peccatum et omne malum,
consequens probat Magister Sentenciarum, dicens in li. II°:
" Cognicio Dei est essencia ipsius, ergo" etcetera1. Reiectis
superfluis, sub brevitate dico quod, licet mala, vicia et peccata
cognoscantur a Deo, nec tamen in Deo sunt, quia, ut
scribit Magister Sentenciarum in li. II°: " Deus non cognoscit
vicia per noticiam approbacionis, per quam res cognita
placet, sed cognoscit mala, vicia et peccata reprobative, per
iusticiam punitivam.Ideo non sunt in Deo quia illa tantum in
Deo dicimus esse in quibus Deus approbative cooperatur" .
Et sic vides aperte quod omnia que sunt in cognicione Dei
sunt in essencia ipsius.