Innocentius episcopus, servus servorum Dei, venerabilibus fratribus
universis Archiepiscopis et episcopis ac dilectis filiis abbatibus, prioribus,
archipresbyteris, decanis, archidiaconis et aliis ecclesiarum prelatis, ad
quos littere iste pervenerint, salutem et apostolicam benedictionem.
Magnis et crebris declarata prodigiis christiane fidei rectitudo, iam
novo sancti novi decorata martirio, signorum recentium fulgore coruscat
et multis hactenus roborata portentis, nunc singularium miraculorum
insigniis confirmatur. Ecce de instanti et moderno fidei pugile nova gaudia
prodeunt, triumphalia signa notescunt, vox fusi sanguinis intonat
incliti martirii tuba clangit, terra non silet, sudans aspersione cruoris,
resonat regio nobili predita bellatore. Ipsequemet gladius parricida proclamat:
«hec sunt certe certa fidei sacre indicia, hec ipsius ydonea testimonia,
|
|