insufficientem forte videritis, adjectione
novorum, eorum insufficientiam utiliter suppleatis.
Vos praeterea notarie Mirabilis et judex
Bartholomaee, oculos apertos specialiter
habere praecipimus, super pelago ratiocinii
Thomae de Brundusio et Siclariorum Apuliae,
ut per incuriam vestram in eos, nostra
Curia non fraudetur.
Cap. XV.
Regi Cypri, recommendatio fratris Heliae.
Tanta est bonae fidei et devotionis probatae
constantia, tantaque laudabilium efficacia
meritorum, quam in provido viro
fratre Helia, dilecto familiari et fideli nostro,
semper et utiliter invenisse meminimus,
quod ipsum jam a fructibus agnoscentes,
personam suam domesticam, nostris
servitiis libenter admittimus, et suae circumspectionis
consiliis fiducialiter inhaeremus. Cum
igitur eundem fratrem nuper ad partes transmarinas
transfretare paratum, pro quibusdam
arduis Excellentiae nostrae servitiis, in quorum
executione personam ejus utilem et necessariam
fore censuimus, a transitu ipso,
praeter suae voluntatis propositum, providerimus
retrahendum: et ipsum, licet invitum,
quodammodo in Curia nostra propterea mandaverimus