eiusdem comitis, fuerunt in pallacio comunis Faventie, in quo congregati erant, ad sonum
canpanarum, consilium populi, consilium generale, consilium ançianorum, consilium credentie
de XX sapientibus, consilium credentie XLVIII sapientum, et massa populi civitatis
Faventie; ibique facti sunt sindici generales totius comunis, civitatis et districtus Faventie
Nicolittus de Çagonada et ego Petrus Cantinelli, et ibidem, flexis genibus ad pedes predictorum
dominorum, facta fuit per eos generalis absolutio omnium et singulorum interdictorum
et excommunicationum actenus factorum et factarum per dictum dominum comitem, vel per
ipsius predecessores vel aliquem eorum, in provincia Romaniole, quacunque ex causa. Et
Iacobus Vintuli notarius de hiis fecit publicum instrumentum, et multi alii notarii de hoc
rogati fuerunt.
Item, eo anno, die veneris secundo mensis iullii, Argoglosii de Forlivio, cum eorum amicis,
qui magno tenpore steterant ad confinia pro comuni Forlivii, redierunt Forlivium cum
magno gaudio et honore.
Item, eo anno millesimo ducentesimo nonagesimo quarto, indictione septima, die V mensis
iullii, facta fuit electio, per dominos cardinales romanos, de summo pontifice; et electus fuit
papa dominus frater Petrus de Morono de Apulia, sive de Abrucio, qui coronatus fuit in civitate
Aquile, die dominico XXIX mensis augusti, et vocatus est dominus papa Celestinus V.
Eo tenpore rumores magni fuerunt in civitate Forlivii et in civitate Faventie, et maximum
guarnimentum hominum armatorum, ita quod ad civitatem Forlivii trasmissi fuerunt
ex popularibus et militibus Faventie. Tandem accidit quod, incepto rumore in civitate Forlivii,
expulsi fuerunt de ipsa civitate Calbulenses, et ex eis plurimi vulnerati; et hoc fuit
die martis XXIII augusti, et captus fuit dominus Guido de Polenta, qui venerat Forlivium
ad faciendum officium capitanarie dicte civitatis, et Ranbertus eius filius cum eo, et plures
alii de Ravenna, et Fulcerius de Calbulo et Iohannes eius frater, et Nicolittus filius Rainerii
de Calbulo.
Demum, die mercurii proxime sequenti, dominus Maghinardus Paganus de Sosenana equitavit
ad civitatem Forlivii, et taliter operatus est ibi, quod predicti omnes capti fuerunt relaxati,
et sibi donati; et ipse tunc electus fuit capitaneus Forlivii aliquot diebus, donec provideretur
de alio capitaneo.
Item, ipse dominus Maghinardus intravit pro potestate civitatis Forlivii, die primo mensis
septenbris, pro sex mensibus.
Item, die primo mensis septenbris predicti, dominus Rossus de la Tosa de Florentia
intravit pro potestate civitatis Faventie, pro sex mensibus.
|
|