De causa discordie inter comitem et marchionem Hestensem.
Fuit autem causa discordie inter eos civitas Mantuana, quia
quilibet eorum voluit habere dominium civitatis illius, et quilibet
perdidit, et dominus Pinamons habuit illud. Et restituit predictus
marchio filios dicti comitis in omnes possessiones quas tenebat
dicti comitis in terra de Lendenaria.
De morte comitis et sepultura in loco fratrum Minorum de Regio.
Et sequenti nocte post festum sancti Marci mortuus est, presentibus
fratribus Minoribus cum quibus confessus fuerat. Et
optime ordinavit de anima sua, et cives Regini optime et nobiliter
de corpore suo. Nam fecerunt ei expensas funereas larga manu
tamquam homini nobili, et qui fuerat eorum potestas, et qui erat
extra possessiones suas occasione ecclesiastice partis. Et in suis
exequiis fuerunt omnes religiosi de Regio et multe religiose nec non
et tota civitas Regina cum multis forensibus. Et nobiliores de
Regio fuerunt corporis portitores, feretrum deportando. Et in
loco fratrum Minorum fuit sepultus.
Item de ornatu corporis eius et pulchro mausoleo.
Et indutum erat dictum corpus eius de scarleto cum pulcra
pelle varia et cum pulchro pallio, et ita ornate positum fuit
corpus eius sequenti die Lune post festum sancti Marci in pulcherrimo
mausoleo quod commune Reginum fieri fecerat ad
communis expensas. Et habuit ensem precinctum et in pedibus
calcaria deaurata et ad cingulum de serico magnam bursam et
in manibus cyrotecas et in capite pulcherrimam capellinam de
variis et scarleto et clamidem de scarleto cum variis pellibus
adornatam. Et dictus comes reliquid dextrarium et arma sua
predicto loco fratrum Minorum.
|
|