Pag 96

et Seth filio suo reliquid. Seth scripsit, et reliquit filio suo Enos. Enos reliquit filio suo
Cainan. Et Cainan reliquit Malalehel. Qui scripsit et reliquit filio suo Enoc. Qui scripta
reliquit Matudalam. Qui reliquit filio suo Lamec. Lamec scripsit filio suo Noe. Noe dixit et
scripsit filiis suis, Cham, Sem et Iaffet. Cham factus est astrologus, et vixit et regnavit
usque ad tempora Beli, patris Nini regis, et scripsit artes liberales et gesta preteritorum.
Item Sem, filius Noe, qui natus est 100 annis ante diluvium, et vixit 500 annis et
35 post diluvium videlicet usque ad tempora Abrahe, et 35 annis ultra tempora Abrahe.
Qui fuit rex Salem, id est Ierusalem, qui etiam vocatus est Melchisedec. Ille idem Sem,
filius Noe, multa scripsit et ea posteris reliquit et morem sacrificandi in pane et vino instituit;
qui usque ad tempora Moysi et Aaron perduravit. Abraham Chaldeus artes Chaldeorum
et Egiptiorum similiter novit et posteros docuit. Moyses etiam artibus Egiptiorum per
studium filie Faraonis eruditus fuit et posteros docuit. Novit etiam omnia per spiritum Dei,
quecumque in mundo et ante mundum fuerant. Preterea Ihonitus, Noe filius, quem genuit
post diluvium, astrologus fuit et iustus ante Deum, qui legitur raptus fuisse in paradisum
et ibi omnia didicisse que erant ante mundi constitutionem, et arborem illam de paradiso
portasse et in monte Libani plantasse, in qua Christus postea est crucifixus, sicut in corpore
libri istius plenius continetur, ubi de Christi passione tractamus. Sunt et alii barbari sive
gentiles istoriografi secundum libros annales antiquorum regum, qui omnia que contigerant
integraliter descripserunt, nec aliquid non scriptum reliquerunt; quorum nomina
aliqua hic dicemus: Mamenot, qui descriptionem fecit Egiptiorum Berosus, qui defloravit
omnia scripta Chaldeorum, Mochus, et Estius, et Ieronimus Egiptius, et alii multi barbari
sive gentiles istoriografi concordant istoriis et cronicis nostris. Ad hec christianos et catholicos
doctores, quos imitamur, in supposito titulo contemplare.