plurimos et diversos. Cuiusdam sinistre manus digitum ex morbo
fistule, plurium foraminum concavitate defossum, mira consolidatione
sanavit. Quidam insuper puer ex casu gravissimo sic oppressus, et motu et
sensu penitus destitutus, tanquam mortuus defleretur, mox apposita de
terra suo pectori, sacro eiusdem martiris cruore contacta, incolumis exurrexit.
Quedam cuius carnem cancer edax sedula corrosione vorabat, linitis
huiusmodi terra vulneribus, est curata. Alii etiam diversis infirmitatibus
occupati, qui sepulchrum eius in vehiculis et aliis substentaculis adierunt,
exinde postmodum, plena incolumitate recepta, sine aliquibus subsidiis
rediere. Ad hec magna hereticorum et ipsorum credentium multitudo,
cum tantam fidei adverterent efficaciam et ad eam tot certis et apertis
signorum indiciis tamquam quibusdam clamantibus preconibus vocarentur,
nec possent quasi tam valide illorum instantie non parere ad ipsius
lucem fidei de sui erroris nubilo est conversa. Quid plura? His et quam
multis aliis miraculis gloriosis magnificavit Dominus sanctum suum, et
colendum exhibuit universis. Letetur itaque totus fidelium cetus et laudum
carmina Domino concinat alta voce, quod a suis tanquam Christi
coheredibus mansiones celice possidentur; exultet mater ecclesia, quod
palmes suus, quem in agro fidei plantavit et coluit, in celeste plantarium
est translatus. Gaudeat et insignis fratrum predicatorum ordo,
quod ex ipso prosiliit stella micans, cuius fulgentes radii in lumen hic
peregrinantium diffunduntur. Erubescant fallaces heretici, evangelice quidem
falsarii veritatis, quod sua mendacia commenta vilescunt et convalescunt
catholica et apostolica documenta. Obmutescant dolosa ipsorum
labia et impudentes frontes decidant tam confuse. Cum ille cuius veracem
instructionem et salutaria monita renuebant cuique mortis intulere supplicium,
in celo iam regnet inter agmina beatorum. Et mirum cum aperte
conspiciant Dei ecclesiam, talibus fulciri columpnis, talibus parietibus
circumcingi, talibus consurgere incrementis, talibus propugnaculis communiri,
talibus defensari patronis, talibus miraculis illustrari, quod nichilominus
|
|