Imparibus modulos pedibus tibi sume novellos,
parvula quos, Nuti, carta nigrata refert.
Iussisti nostram rursus resonare viellam,
contentus nervo quem digitare velim.
Illa quidem tenero nimium concordat amori:
hoc est cur cantem carmen amoris ego;
vel quia, cum fuerit permissa licentia nobis,
labor ut Anteus viribus auctus humi;
vel quia materiam de qua plus tangitur auctor,
si celare velit, ora coacta sonant.
Nuper amore cremor, quadam faciente puella;
nolo tibi lateant hora, locusque modus.
Festa dies fuerat sancto celebrata Iohanni
Baptiste; supplex limina sacra peto.
Et domine veniunt; iuvenes, vaga turba, secuntur:
Bononie sanctis plus celebratur Amor.
Ingredior templum, varia de gente repletum;
intus et exterius pervolitabat Amor.
Offero denarium; post hinc, altaria linquens,
in pratum redeo, lumina quaque ferens.
Hic glomerata cohors dominarum ex parte sedebat;
hereo, que veneri sit magis apta notans.
Una puella vagos in me defixit ocellos;