Quaestio. Quot sunt species nominum? Duae: primitiva, quae primae
positionis dicitur, quoniam a nullo sumit originem, ut mons; alia
derivativa, quae secundae [in]positionis est, quia a fonte primitivorum,
velut de fluvio rivulus, nascitur, ut a monte monticulus.
Propriorum quoque nominum secundum Latinos quattuor sunt
species: nomen, praenomen, cognomen, agnomen. Nomen est, quod imponitur
rei non habenti nomen. Praenomen est, quod causa differentiae
nomini proprio additur. Cognomen est cognationis commune.
Agnomen est, quod ab aliquo eventu imponitur.
Derivativorum autem nominum multae sunt species.
De patronomicis. Alia namque sunt patronomica, quae a propriis
nominibus patrum derivantur et significant filios vel nepotes cum genitivo
sui primitivi, ut a Priamo Priamides.
De possessivis. Alia sunt possessiva, quae cum genitivo primitivi
significant aliquid ex his, quae possidentur, ut Evandrius ensis pro
Evandri[i] ensis.
Differentiae. Hoc autem interest inter possessiva et patronomica,
quod patronomica filios vel nepotes significant, possessiva vero non
solum filios, sed quae omnia in possessione esse possunt; patronomica
quoque a propriis nominibus tantummodo derivantur et ad homines
tantum pertinent vel ad deos, possessiva vero etiam ab appellativis
veniunt et ad omnes res pertinent.
|
|