Domino Beneventano archiepiscopo Stephanus.
Ad bonos pertinere mores arbitror dominos in sublimi positos servitorum
et devotorum aliquotiens reminisci, eosque prosequi gratia quam
meruisse cernuntur. Hec adduco suplicans et adducens supplico reverenter,
quatenus non sic habitus vos circumveniat status vestri, ut a devoto
vestro magistro Petro de Benevento, domini pape scriptore, quem tunc a
fato dependens status non habitus quem habetis carum vobis effecerit et
acceptum, cui etiam sicut et pluribus aliis plerumque terram promisistis
et mare, sic vestram obliviscibilem memoriam abdicetis, quin ipsum
beneficiorum vestrorum, que saltem in crumenam vestram ponere non
potestis, participem faciatis. Silere non possum, sed cum venie protestatione
vos alloquor: quoniam omnibus hoc vitium est, ut honoris apicem
non adepti promissionis verbis ampullose sint dapsiles, iam adepti et sibi
et aliis sint tenaces, utinam tales, ut talionem reciperent, cursum senilem
retrogradum sustinerent.
|
|