et cardinalium et legatorum uestrorum, Romoaldi uenerabilis Salernitani archiepiscopi et
Roggerii egregii comitis Andrie, et principum ac fidelium nostrorum a comite Henrico de
Diessa in anima nostra supra sancta Dei euangelia et sanctorum reliquias iurari fecimus,
et Henricum filium nostrum per interpositam dignam personam in anima sua id ipsum
iurare faciemus usque ad medium futurum Septembrem indictionis undecime. Et principes
nostros idem iurare fecimus, uidelicet Christianum Maguntinum archiepiscopum, Arnoldum
Treuerensem archiepiscopum, Corradum Guormaciensem electum, Godefridum imperialis
aule cancellarium, Guorwinum protonotarium, markyonem Theodericum de Lusiz,
Florentium comitem Holandie, comitem Dedonem de Groyx, comitem Henricum de Diessa,
comitem Roupertum de Durna. Ad huius autem pacti, promissionis et iuramenti nostri
et Heinrici regis filii nostri et principum nostrorum memoriam et inuiolabile firmamentum
presens priuilegium nostrum per manus Wortwini protonotarii nostri scribi fecimus, et imperiali
sigillo nostro aureo sigillatum et predictorum principum iuramento communitum
uobis suprascripto illustri regi W[illelm]o fecimus assignari. Anno dominice incarnationis
m[illesim]o c[entesim]o septuagesimo septimo, mense Augusti, decima indictione”.
Postquam uero imperator prescriptum priuilegium nuntiis regis tradidit, et quod missurus
esset Christianum cancellarium in Siciliam pro recipiendis iuramentis ueri similibus repromisit,
prenominati nuntii non contenti imperiali priuilegio, ad maiorem certitudinem pacis
inite robur et firmamentum, aliud priuilegium a papa et cardinalibus Romano fecerunt more
conscribi, in quo imperiale declaratum est priuilegium et auctoritate sedis apostolice roboratum.
Quo facto Huguiczonem cardinalem ex mandato pape et imperatoris cum imperialibus
litteris et cum notario Salernitani archiepiscopi et cappellano comitis Roggerii ad castellum
Gayue, ubi imperatrix cum Heinrico rege filio suo morabatur, aduenit. Presentibus
itaque imperatrice rege Heinrico filio eius, cardinali, markyone de Monteferrato et quibusdam
de rectoribus Lombardie et notario archiepiscopi et cappellano comitis et multis aliis
uiris probis et idoneis, Uerdensis episcopus stola collo imposita, ex mandato imperatoris et
|
|