In cruce Christi gloriabor tantum, quia hoc tantum
valet ad Christi salutem promerendam; non enim
aliud, quia neque circumcisio, neque praeputium.
17. AUGUST. ( Expos. ad Gal. ). Per quem mihi
mundus , id est, ut non me teneat; et ego mundo , ut
eum non teneam, id est, ut neque mihi mundus
nocere possit, neque ego de mundo aliquid cupiam.
18. ( Ibid. ) Sed nova creatura . Novam creaturam
dicit vitam novam per fidem Jesu Christi.
19. ( ibid. ) Super Israel , id est, qui vivere ad visionem
praeparantur; non qui vocantur hoc nomine,
et carnali caecitate Deum videre nolunt.
20. LANFR. De caetero . De caetero, inquit, nemo
vestrum onerosus et inobediens mihi sit, putans me
non esse Apostolum Christi.
21. AUGUST. ( ibid. ) De caetero . Non vult per turbulentas
contentiones taedium sibi fieri de re, quantum
satis erat, exposita.
22. ( ibid. ) Ego enim stigmata , id est, habeo alios
conflictus et certamina cum carne mea, quae in persecutionibus
quas patior, mecum dimicant. Stigmata
Jesu dicuntur quaedam notae poenarum servilium.
Propter culpam enim persecutionis, qua persecutus
est Ecclesiam Dei, haec sibi retribui cognoverat.
23. LANFR. Stigmata . Stigma proprie nota fugitivo
servo impressa; quod Apostolus se portare dicit,
eo quod prius Dominum fugerit.
24. In corpore meo . In corpore suo portabat cicatrices
vulnerum et virgarum, in collo et manibus
catenas; quae omnia signa erant se esse Domini
nostri Jesu Christi. Stigmata autem erant signa
quaedam, quae in manibus militantium fiebant, per
quae cognoscebantur esse de militia imperatoris.
|
|