: Statuta insule et ripperie Horte

Pag 53


IX. DE PENA FACIENTIUM RIXAM ET PERCUCIENCIUM,
TAM CUM SANGUINIS EFFUSIONE QUAM SINE.
ITEM si quis fecerit rixam solvat soldos .X. imperialium; qui
vero percusserit aliquem sine sanguinis effusione, si fuerit levis
percussio, solvat soldos .XX. imperialium, si vero gravis,
condampnetur arbitrio castellani, secundum qualitatem excessus
a libris tribus usque ad libras sex imperialium. Quod si percusserit
cum sanguinis effusione, si levis fuerit percussio, solvat soldos .LX.
imperialium, si gravis, libras decem imperialium, si gravior,
condampnetur arbitrio castellani usque ad libras .XXV. imperialium;
salvo si talis fuerit percussio per quam tota pars percussa vel
membrum eius debilitaretur vel deformaretur perpetuo, quod tunc
castellanus possit condempnare percutientem usque ad libras
quinquaginta imperialium; et ultra hoc, in predictis cum simillibus
casibus, percussor percusso condampnetur ad restitutionem dampni
et interesse cum expensis. Castellanus vero quemlibet dictorum
percussorum tenens nullatenus eum rellaxet quousque de predictis
omnibus percussor satisfecerit vel satisfactionis idoneam dederit
cautionem. Et pena dicti statuti non habeat locum si maritus
percutiat uxorem vel pater filium vel avus ablaticum vel frater
maior fratrem minorem vel patruus vel avunchulus nepotem,
stantes in eadem familia et domo sue habitationis, causa correctionis,
dummodo ex dicta percussione percussus non esset privatus
membro vel enormem cicatricem haberet seu aliam enormem
lexionem vel ipse percussus accusationem fecerit de predictis.
X. DE RIXIS ET FERUTIS FACTIS IN DIE MERCATI IN
ORTA.
ITEM si quis in die mercati in Orta fecerit aliquam rixam vel
misculantiam vel ferutam, si fecerit rixam vel misculantiam,
componat pro banno pro quolibet et qualibet vice suprascripto
domino castellano solidos .LX. imperialium et, si fuerit feruta et
sanguis inde exiverit, componat libras decem imperialium.

Torna all'inizio