Pag 325

impetum armatorum." Homines autem ciuitatis huis audientes
statim fregerunt portas palacii regis, et extrahentes inde uxorem
Candeoli eandem sibi continuo restituebant. Tunc Candeolus
adorauit eum et dixit: "Optime Anthioche, mi karissime! Rogo
te, ut mecum uenias coram presencia matris mee, ut de honore
a te michi facto dignum meritum recipias et honorem." Quo
audito Alexander gauisus est ualde, eo quod desiderabat uidere
reginam Candacem et ciuitatem eiusdem, et dixit ei: "Eamus
ad imperatorem Alexandrum et postula me ab illo! Sicque
omnem faciam tuam uoluntatem." Factumque est. Et accepta
licencia iuit cum Candeolo. Et cum simul itinerarent, uenerunt
ad altos montes pertingentes usque ad nubes. Et in eisdem
montibus uiderunt arbores excelsas nimis, similes cedris, poma
Indica deferentes. Quas cum uidisset, Alexander miratus est
ualde. Eciam uidebat uites habentes botros maximos, quod unum
homo non posset portare, et nuces ferentes fructus maximos. Et
in eisdem locis symie innumerabiles habitabant etc.
Qualiter Alexander uenit ad Candacem reginam
109. Deinde ambulantes uenerunt ad ciuitatem Candacis
regine. Audiens Candacis regina, quod Candeolus cum uxore
sua incolomis remearet et qualiter nuncii Alexandri cum eo
uenirent, gauisa est ualde. Statimque induit se uestimentis
regalibus et imposuit capiti suo coronam auream et lapidibus
preciosis ornatam. Et una cum suis magnatibus usque ad gradus
palacii sui obuiam uenit. Erat autem regina formosa nimis,
pulcra et decorata. Cumque uidisset eam Alexander, uisum est
ei, ac si figuram matris sue Olympiadis conspiceret. Palacium
uero ipsius erat preciosum ualde, et tectum ipsius auro et gemmis
aureis fulgentibus corruscebat. Et ascendit Alexander una
cum Candace regina in triclinium palacii, in quo erant lecti ex
auro purissimo constructi. Et erat ipsum triclinium ornatum ex
auro et lapidibus preciosis et ex smaragdis et amatistis. Columpne
ipsius palacii erant ex lapidibus profereticis et habebant sculptos
currus falcatos et elephantes sculptos. In ipsa siquidem die epulatus
est Alexander cum regina Candace et filiis suis etc.
Qualiter Alexander timuit de aduentu suo ad Candacem reginam
Alio uero die apprehendit regina Alexandrum per dextram
et cum eo sola cubiculum intrauit, quod erat totum lapidibus
preciosis coopertum. Eratque ipsius splendor ad instar solis.
Deinde ingressa est cum eo aliud cubiculum constructum ex
lignis buxinis et cypressinis. Eratque positum ipsum cubiculum
per artem mathematicam super rotas et a uiginti elephantibus
trahebatur. Cum autem intrassent Alexander et regina cubiculum,
continuo motum est ipsum cubiculum et cepit ambulare.