deum et adoptiuum filium adfirmare conaris, catholica
nihilominus fides ignorat, sed et te cum eum scire modis omnibus
dedignatur. Habeto tu tibi alium cum sequacibus tuis, qui non est
natus de spiritu sancto et Maria uirgine, nuncupatiuum deum. Nos
autem uerum deum et unigenitum filium dei Christum Iesum
dominum nostrum qui natus est de spiritu sancto et Maria uirgine
et habemus et habebimus et in uenturo saeculo habituri sumus:
qui cum patre et spiritu sancto uiuit et regnat deus in trinitate
perfecta et nunc et semper per cuncta et ultra et infinita saecula
saeculorum. Amen. Qui dedit semetipsum pro nobis, ut nos redemeret
ab omni iniquitate cuique pater ut abundantius commendaret in
nobis suam caritatem, non pepercit, sed pro nobis omnibus tradedit
illum,quem apostolus proprium, non adoptatiuum filium confitetur:
Proprio inquit filio suo non pepercit deus, sed pro nobis omnibus
tradidit illum. Hinc alias Iohannes euangelista testatur dicens: Sic
deus dilexit mundum, ut unigenitum filium suum daret pro mundi
salute. Vnigenitum dedit, non adoptiuum. Nulla, inquam, tibi
sofistica ratione, remigero si pennis etiam non columbae sed strutionum
uolare coneris, duo relatiua nomina unius filii ad personam
unius patris referre conceditur. Animaduerte quid dixerim: non
poteris filium et filium quod est relatiuum ad aliquid, hoc est
proprium et adoptatiuum, uni adscribere genitori. Nam cum sit
deus omnipotens pater unus unumque coaeternum sibi genuerit
omnipotentem filium, quo igitur pacto unus natus unius genitoris
et proprius et adoptatiuus filius intellegatur, nullius umquam
possibilitatis ordo permittit. Praesertim cum haec de filio dei
agantur, qui sempiternus de sempiterno patre genitus, sic quodam
mirabili modo secundam prorsus propter nos in tempore sustinuit
natiuitatem, quatenus et hominis filius quia uoluit fieri, et dei filius
idem ipse incommutabilis permaneret. Et tamen non duo, dei et
hominis filius, sed unus idemque dei hominisque filius adoratur.
I 35 (I 54) In tanto igitur tibi uiluit magnum pietatis sacramentum,
quod manifestatum est in carne, quatenus idcirco uerus deus
|
|