plura iterum repetens veterumque exempla parentum
commemorans, tandem haec ornato carmine subdit:
« Evandri quondam natum Pallanta superbus
imparibus iuvenem Turnus iugulavit in armis;
hinc tros Eneas generum mactasse Latino
dicitur, hoc illi iuncta est Lavinia coniunx:
sic vos vindictam, sic vos properate cruorem
fundere et ammissum per proelia quaerere nomen!
Hic labor, haec virtus, si quando iniuria facto
incidit, hanc armis gestisque extinguere rebus
et cum perpetuis penitus delere triumphis.
Ite, animo fortes, Teucrumque asperrima caelo
arma date et belli morem pater instruat Hector! ».
Dixerat, utque abeunt tormenta ingentia mittit,
quae possent turres atque ardua menia terrae
deicere et populos terrere in bella latinos.
|
15
20
25
30
|