Octave egloge titulus: Divortium. Collocutores Ganimedes
et Amiclas.
       
Ga. Quo fugis ? Expecta; liceat condiscere causas
       Discidii. Tu nostra, puer, (nisi fallor) amabas
       Pascua. Quo, pastos, abigis cum matribus agnos,
       Ingrate atque oblite mei rerumque mearum ?
Am. Parce, parens, damnare tuum. Puer, ipse fateris,
       Hac pavi regione gregem. Tibi letior annis
       Tunc animus fuerat; nunc intractabilis, asper.
       Me quoque vivendo patientia prima reliquit.
Ga. Consilium solet esse senum, iuvenumque voluptas;
       Tu michi deliras, senior; tum vallis amator
       Unius, deserta vagus nunc avia tentas.
Am. Propositum mutat sapiens; at stultus inheret.
       Res, tempus, fortuna, locus firmata frequenter
       Consilia alternant. Macie turpique veterno
       Terga pecus confecta gerit; squalentia sentes
       Vellera dilacerant. Quid agam ? Nec pocula fontis
       Tuta, nec herbarum morsus sucique salubres.