Eidem idem.
Sinceritatis affectus, quo ex intimis precordiis magnitudinis vestre zelamus
honorem, cogit nos scribere et familiari stilo vestram excellentiam
excitare, ad ea que Deo placita credimus et fame vestre preconiis convenire.
Unde si quando vel rumor incertus aut fame vulgaris opinio quamvis
levis in curia Romana presertim divulget aliquid, quod in offuscationem
vestre laudis et fame clare redundet, amicitie stimulus nos excitat et perurget,
ut, in archanum vestre familiaritatis admissi, suadeamus domestice,
que vestre magnificentie credimus expedire. Intellecto igitur non modicum
divulgato, quod … sui officii debitum exequens … decanatu privavit,
magnitudinem vestram, qua possumus affectione, requirimus et
attente rogamus, quatinus ob Illius reverentiam, qui regnantibus dat salutem,
pro cuius honore estis crucis signaculo insigniti, et fame vestre claritatem
servandam, que, Illo faciente qui potest, diffunditur clare per
orbem, super huiusmodi spiritualibus negotiis nolitis interponere partes
vestras, maxime contra ecclesiasticam libertatem, quam a vobis decet
exemplariter in aliorum regum corda diffundi, et quod super hoc hactenus
sub vestro titulo seu colore contra libertatem huiusmodi factum fore vulgatur
per clementiam vestram revocetur honeste, cum sapientis sit in
melius consilium commutare.
|
|