Christiani faciant ad honorem et gloriam. Simile est de rasura Petri
et nostra. Nondum Christiani plusquam CCC milites habebant et tot de peditibus, qui
Ierusalem, Iopem, Ramulam et castrum Cayphe custodirent, nullumque portum preter Iopem;
cetera Saraceni. Tunc temporis Ianuensium stolus advenit; convenitque inter regem
et eos, ut quicumque Saracenorum civitatem caperent, terciam partem haberent. Primo
itaque ceperunt oppidum Assur, deinde urbem Cesaream Palestinam, ubi archiepiscopum
constituerunt. Tempore procedente rex cum paucis contra ducem Babiloniensis milicie
prope Ascalonam dimicavit eumque et inmensum illius exercitum superavit.
CVII. De captione Tortose et obsidione Ferarie.
Anno Domini MCII. Alius Francorum exercitus superveniens labores multos et
dampna perpessus est, sed postmodum Tortosam ceperunt; inter quos fuit comes Pictaviensis
et comes Burgondie et comes Blesensis; cum quibus et vix CC militibus rex
viginti Saracenorum milia cum suorum infortunio expugnavit infra Ramulam; aliaque
vice Iopem, quam prendiderunt, gratia salvatoris adiutus obtinuit. Eodem anno in
Ytalia Ferariam civitatem obsedit comitissa Matildis.
CVIII. De Boamundo, qui liberatus fuit a carcere.
Anno Domini MCIII. Boamundus a Turcorum carcere liberatus est et sicut princeps
Antiochie receptus est; qui et Lauditiam a Tancredo, qui eam Constantinopolitani imperatoris
hominibus abstulerat, acquisivit.
CVIIII. De obsidione, Acon.
Anno Domini MCIIII. Rex obsedit Acon et auxilio Ianuensium impugnavit eamque
per deditionem optinuit. Eodem anno Boamundus iuxta Charcam, que est prope
Eufratem, contra Turchos pugnavit magna strage suorum. Dein Franciam properans
filiam regis Phylipi Constanciam accepit uxorem, principatu Tancredo relicto.
CX. De Tancredo principe Antiochie; de expugnatione quam fecit
contra Saracenos.
Anno Domini MCV. pugnavit Tancredus Antiochie princeps contra Saracenos eosque
viriliter expugnavit. Rex quoque Balduinus inter Iopem et Ramulam cum quingentis
militibus et duobus milibus peditum XV milia Turchorum, Ethiopum et Arabum superavit.
Eodem anno in vigilia nativitatis Domini Ierosolimis magnus extitit terremotus. |
|