Expedit tibi, venerande princeps, ut exerceas presules ad sanctarum scripturarum
indagationem et sanam sobriamque doctrinam, omne[m] clerum ad disciplinam,
philosophos ad rerum divinarum humanarumque cognitionem, monachos ad religionem,
omnes generaliter ad sanctitatem, primates ad consilium, iudices ad iustitiam, milites
ad armorum experientiam, prelatos ad humilitatem, subditos ad oboedientiam, omnes
generaliter ad prudentiam, iustitiam, fortitudinem, temperantiam, pacem atque concordiam.
His et his similibus, virorum optime, Deo tibi propitio sanctae ecclesiae
fastigium adcumulare non cesses, ut admirabili in rerum ecclesiasticarum sive civilium
administratione strenuus et sapientiae fonte redundes et virtutis exhibitione triumphes.
-------------------------------------------------------------------------------------------------------------
... Sciendum namque est, quoniam et ille, qui ab Hierosolima descendens, hoc
est a pacifica contemplatione sanctae ecclesiae, recessit, et iste, qui a paradysi moeniis
eliminatus dicitur, id est ab ovili ecclesiae et consortio fratrum segregatus exiit,
et omne menbrum, quodquod abscisum de corpore fuerit, hoc est ab unitate ecclesiae
separatum, nisi per paenitentiam et dignam satisfactionem donum gratiae omnipotentis
Dei ascendat Hierosolymam, videlicet ad contemplationem sese pacis suspendat,
et ad eum quod reliquerat recurrat ovile, hoc est caritatis vinculo religatus in
gremio suscipiatur ecclesiae, et in eo a quo praecisus est corpore inseratur, in unitatem
scilicet, et reconciliatus consocietur fratrum, salvus esse posse, quemammodum
et vos satis excellenter sacratius capaciusque scitis, nullo falsitatis quodlibet modo
sibi blandiatur fraude deceptus. Vae ergo illis, nisi altissima illis pietas benigna succurrat
paradigmate, quae et semivivo relicto et erranti perditaeque oviculae et absciso
de corpore membro pretioso subvenit misericorditer sanguinis ostro. Dignetur
itaque et vestra serenitas super has plagas vulnusque peccati infundere vinum et
oleum. Aspera siquidem ac lenia documentorum instillare fomenta necnon fasciolis
caritatis fracturas infarcire medicinali manu curato, quatenus subvecti patientiae vestrae
iumento ad stabulum perducantur ecclesiae curamque vestrae exhibitam beatitudinis,
ac per hoc assimilatus bono singulariter pastori, erraticam subvehens humeris ovem
ad ovile proprium, quippe ad sinum scilicet matris ecclesiae reportare gaudete; dissociata
nempe de corpore membra, imitantes per omnia Paulum apostolum, per unitatem
fidei et caritatis concordiam summo ac singulari unire capiti festinate, quatenus reddita
per vestram industriam omnibus pace, et illis sicut decet summo tantoque pontifici
honoris debitum et oboedientiae offerant fructus, et ut dominum timeant et veluti
patrem multa inpensi amoris dulcedine diligant, et vestra eos benignitas tranquillitas
quasi proprios refovens filios, perpetua protectione gubernet, vobisque pro dignae retributionis
premio caelestia regna aeternus arbiter largiri dignetur.
|
|