De Valentia. Valentia ciuitas, quae postea Casuntina dicta est,
sita fuit in latere montis, ad cuius radices postea constructum oppidum
fuit, quod Sanctus Geminus dicitur, cuius historiam hic ad
honorem Dei describimus.
De sancto Gemino. Geminus, sanctus Dei electus, in prouincia
Siriae natus ex nobili patre, Militiano nomine, militiae duce, qui
cum rege suo dominabatur in Siria. Puer uero Geminus a sua infantia
Deo adherens, nam Spiritus Dei erat cum illo, rumores hominum
et lasciuias malorum iuuenum deuitabat, morando in ecclesiis,
orans et legens; et omnibus moribus informatus imaginem
Deiparam in se ipso conseruabat.
Tunc temporis Caldei armati Siriam inuadentes depredabantur
et cum multis spoliis et thesauris acceptis reuerterunt ad mare, ut
transfetarentur in Caldea. Militianus, congregato exercitu Sirorum,
dixit Gemino filio suo: «Mi Gemine, ueni armatus, ut inimicos
nostros Caldeos prosequamur et nostra recipiamus ab eis». Et Geminus
dixit: «Pater mi, uade tu cum exercitu tuo ad pugnam, et
ego pro uobis orabo ad Deum». Et cum exercitu currens contra
Caldeos, uidebat Geminum antecedentem eos, euaginato gladio,
Caldeos fugantem.
Itaque oratione beati Gemini, relictis, quae rapuerant, et Militianus
uictor rediens cum spoliis, incitantibus omnibus, ad mansionem
rediens, ait uxori: «Ubi est filius meus Geminus?». «Ecce,
orationibus uacat pro te et exercitu tuo». Et ipse, intrans ad filium
suum misit se ad pedes eius, referens haec omnia, et osculabatur
eum, dicens: «Fili mi dulcissime, tempus est, ut reuertar ad
Dominum, qui misit me in mundum; doceas me ipsum colere et
timere». Et uir Dei Geminus, exultans in Deo, gratias egit, dicens:
«Gratia ago tibi, Domine, quia patrem meum in hanc gratiam
adduxisti». Et sic instituit eum et matrem suam in fide
Christi cum tota familia, et baptizauit eos. Et Militianus in nouum
hominem renouatus, cum orationi deuote uacaret, in altera
hora denarium accepit eternae uitae, sicut alii primi omnes.
|
|