Item, eodem millesimo CC.LXXXXIII, indictione sexta, Petrus filius domini Guidonis de
Glauçano, de Acharixiis Faventie, desponsavit et duxit in uxorem dominam Guilielminam filiam
olim fratris Çanbraxini de Çanbraxiis, cum magno gaudio et triunpho; et hoc fuit die dominico
XXVI mensis aprilis.
Item, eodem die, dominus comes Bandinus de Mutilliana venit Faventiam, et, die lune
sequenti tunc proxime, ivit Forlivium, moraturus ibidem pro capitaneo generali totius societatis
terrarum huius provincie Romaniole.
Item, eodem anno, die XXIII mensis maii, obiit dominus comes Guido de Mutilliana. Item,
eodem anno, die martis XXII septenbris, obiit dominus Alborixius canonicus Faventie.
Item, anno predicto millesimo ducentesimo nonagesimo tercio, indictione sexta, die primo
mensis septenbris, intravit regimen civitatis Faventie Rossollinus filius domini Henrici de la
Tosa, de Florentia, qui fuit potestas Faventie per sex menses, videlicet a primo septenbris
usque ad primum diem mensis marcii anni sequentis, et dominus Maghinardus capitaneus.
Item, anno domini millesimo ducentesimo nonagesimo quarto, indictione septima, die
prima mensis marcii, intravit regimen civitatis Faventie dominus Nicolaus de Malavoltis de
Senis, et dominus Maghinardus capitaneus.
Item, eo anno, die mercurii XIX maii, Maxius domini Acharixii et Prosperius domini
Guidonis Acharixii de Faventia vulneraverunt fortiter Nicolaum de Aspronibus, ita quod, ex
dictis vulneribus, mortuus est.
Item, eo anno, die mercurii XXVI mensis maii, in civitate Forlivii, facta sunt instrumenta
pacis et concordie inter dominum Ildebrandinum comitem Romaniole, ex una parte, et Faventinos
et Forlivienses et alios dominos civitatum provincie Romaniole, ut infra dicetur.
Item, eodem anno, die sabati XXIX mensis madii, in sero, ad petitionem et mandatum
domini comitis Romaniole, equitavit dominus Maghinardus capitaneus civitatis Faventie, cum
militibus ipsius civitatis et militibus de Forlivio, et cum bona quantitate peditum proborum
virorum, ad castrum Tauxignani, tota illa nocte; et, in die festo dominica sequenti, in hora
tercie, ibi fuit: ipsa etiam die, magnus rumor et discordia erat inter ipsum dominum comitem
et suos sequaces de dicto castro, ex una parte, et eius emulos ex altera, et etiam prelium
fuerat inter eos, qui, audiendo subsidium advenisse ipsi domino comiti, statim cesserunt; et
aliquos ex eis cepit, et alii aufugerunt. Demum, ipsum castrum totum remansit in dominio
eiusdem domini comitis, et dominus Maghinardus ibi posuit custodes suos, tam milites quam
pedites oportunos, et, ipsa die dominica, rediit Faventiam, et idem dominus comes multos de
ipso castro misit ad confinia.
Item, die mercurii IX mensis iunii, idem dominus Maghinardus, cum militibus de Faventia,
equitavit ad Tauxignanum, et sociavit dominum comitem Romaniole, qui separavit [se] deinde,
et venit ad Mutillianam ipsa die mercurii.
Item, die veneris XI mensis iunii, iuxta formam literarum transmissarum per dictum dominum
comitem ad dominum episcopum et prepositum Faventie, idem dominus prepositus
ex commissis et concessis per dicta, et etiam ex commissione sibi facta per dictum dominum
episcopum faventinum, et dominus Manente prepositus ariminensis, qui erat iudex subdelegatus
|
|