circa Parmam cum Theutonicis suis et cum aliis qui erant ex
parte sua, si quo modo se posset de Parmensibus vindicare,
qui eum fugaverant et Victoriam civitatem suam destruxerant,
quam fecerat prope Parmam in contrata que dicitur Grola. Et
habebat tunc temporis dominium Mutine, Regii et Cremone; et
pars istarum trium civitatum que dicebatur Ecclesie vagabatur
exterius vagipalando per devia.
De Lodoyco rege Francie, qui contra Saracenos orientales transfretavit.
Quod Bononienses ceperunt Baçanum et destruxerunt.
Item in supradicto millesimo Lodoycus rex Francorum transfretavit
contra Saracenos orientales, et subito obtinuit Damiatam
Saracenorum civitatem.
Bononienses obsederunt Baçanum castrum Mutinensium et
ceperunt die VI° intrante Iulio ac destruxerunt. Item recuperata
est Romaniola per Ecclesiam, quam primo tenebat dictus Fridericus
depositus, Octaviano diacono cardinali tunc legato in
partibus Lombardie. Et etiam Marchia Anconitana quasi tota
recuperata est.
Item, predicto millesimo, ut iam dixi, Lodoycus rex Francie
cum fratribus suis et Francorum milicia et vulgo innumerabili
circa Pentecosten crucesignatus iter agressus est et transfretavit,
ut Saracenos debellaret pro recuperatione Terre Sancte,
et prima fronte Damiatam cepit. Postea vero, peccatis Francorum
exigentibus, interfectus est frater regis maior post regem,
Robertus nomine. Sed et ipse multum culpabilis fuit, quia credebat
omnes Saracenos involvere et subito uno ictu occidere.
De montibus qui corruerunt in terra comitis Sabaudie et VII parochias cooperuerunt
et IIII milia hominum occiderunt, anno Domini MCCXLVIII.
Item in predicto millesimo in valle Morienne, que est a Sagusia
Lombardie usque Lugdunum, inter Gracinopolim civitatem
|
|