vestre pietatis et misericordie clementius aperire. Valeat et vigeat vestra
sancta paternitas per tempora feliciter longiora, et prosperis semper successibus
extollatur.
Domino pape conventus Casinensis super eodem.
Quam Christus in Petri petrea soliditate fundavit, apostolice sedis
ampla benignitas, velut pia mater invitat eminus filios ad levamen et
cominus evocat ad ubera miserationis oppressos, ut nec vicinis desit sublevatrix
manus a casibus, nec absit procul agentibus salutaris remedii antidotum
a ruinis. Hoc foris clamitat, in plateis dat patulo vocem suam, ut
currant omnes sitientes ad aquas et properent ad refocilationis haustum et
redemptionis lavacrum, qui ab estu fatigationis cuiuslibet opprimuntur.
Huius profecto sedis sancte miserationis effluxus viam nobis aperit, et
apertam ostendit, ut ad sedentem in throno eius, constitutum specularem
filiis et tam sapientibus quam insipientibus debitorem, nos, grex caule
confexoris almi beatissimi Benedicti, recurramus in nostris afflictionibus
et necessitatibus confidenter. Proinde, clementissime pater et domine, pietati
vestre, sub firma proventure nobis fiducia relevationis, exponimus,
quam, ex diutina vacatione monasterii Casinensis, ubi virtutum Domino
monachale pensum servitutis exolvimus, iacturam gravem, tam in spiritualibus
quam in temporalibus, experimur; et vacatione crescente cum
tempore crescunt iacture ac dispendia graviora, ita quod velut grex absque
pastore lupinis patemus incursibus, et utpote navis, pleno velo, remigis
officio destituta, naufragium pertimescimus et iacturam. In hiis itaque tribulationum
|
|