Iacobus de Varagine: Chronica civitatis Ianuensis

194


tamen sepe a multis malitijs impediri. unde dicit Dominus
per Oseam prophetam de muliere fornicaria: "Ecce ego sepiam
vias suas spinis, et semitas suas non inveniet et sequetur
amatores suos et non apprehendet eos". tunc vir vias impudice
mulieris cum spinis sepit, quando multas cautelas et impedimenta
sibi opponit. quedam autem uxores sunt medie, que
nec adhuc sunt bene probate nec omnino suspecte. iste nec sunt
nimis artande nec nimis relaxande, sed prius sunt probande. si
enim amicus, antequam homo confidat de eo, est probandus,
multo fortius uxor. ideo dicitur in Ecclesiastico: "Si
possides amicum, in temptatione idest in probatione posside
eum et ne facile credas ei te ipsum". quod viri et uxores debent
se mutuo diligere. [capitulum tertium]
Dilectio mutua inter virum et uxorem neccessaria est. nam
viri debent diligere uxores suas. ideo dicit Apostolus in epistola
Ad Ephesios: "Viri, diligite uxores vestras, sicut et Christus
Ecclesiam". non enim vir debet uxorem suam timere
tanquam dominam nec sibi eam subicere tanquam ancillam, sed
eam diligere tanquam sororem et sotiam. ideo prima mulier
non est facta de capite viri, quia non debebat esse eius domina;
nec de pede viri, quia non debebat esse eius ancilla; sed de latere

Torna all'inizio