munitas et per nostrum iudicem examinatas prudenter
et per notarium nostrum fideliter publicatas, fraternitate vestre
mittimus predilecte, semper ea facere pro viribus cupientes,
que possint et debeant amicitie vestre merito complacere.
XXV.
De paupere clerico scholare
ad prelatum pro aliquo beneficio habendo.
Venerabili in Christo patri et post Deum unico desiderio
et refugio singulari V., Dei gratia dignissimo episcopo talis
loci, C. suorum clericorum minimus, scholaris Bononie cum
recommendatione se ipsum. Illius portus amenitas frequentatur,
ad quem venientes sperata gratitudine non privantur. Unde
benignissime paternitatis vestre pedibus advolutus, supplicare
non desino, ut mei vestri fidelissimi famuli misericorditer dignemini
recordari, mihi divine pietatis intuitu providendo
in beneficio competenti, ita quod mea devotio que in sola spe
gratie vestre innititur, inopem vitam defendere valeat, et ad
Dei laudem et honorem vestrum incomparabilem, scientie gratiosa
possit capere documenta.
XXVI.
Ad predictam responsiva prelati in aliquo providentis.
V. miseratione divina episcopus talis loci, dilecto sibi C.
scholari Bononie salutem et benedictionem. In memoria nostra
devotio tua sedet, cui nondum potuimus providere, cum beneficium
nullum vacaverit, cuius ad nos collatio pertineret.
Unde, specialem gratiam facientes tibi, de nostra camera decem
marchas annis singulis consignamus, donec locus idoneus
apparebit quem tue fidelitati conferre possimus canonice, prout
optas. Et quia parum est, in signum rei maioris debeas recipere
congaudenter, quia non quid quisque tribuit, sed qua
mente rationabiliter quis intendit intuendum est.
|
|