Verumtamen, charissimi, arma ista ne putetis
sic esse ut quasi quod scutum, semper scutum sit,
aut quod galea est, semper galea sit; aut quae
lorica, semper lorica sit. In istis enim armis corporalibus
ita est, quanquam et de ferro quae fiunt
mutari possint, ut ex gladio securis; tamen ipsum
apostolum videmus dixisse quodam loco, loricam
fidei , et alio dixisse, scutum fidei . Scutum ergo est,
quia tela inimicorum excipit et repellit. Lorica est,
quia interiora tua transfigi non sinit.
11. AMBROS. In die malo . Diem malum praesentem
vitam dicit, eo quod in praesenti saeculo mala [ f .,
mali] agunt.
12. LANFR. Calceati pedes . Calceatos jubet pedes
nostros esse, quia cogitationes nostrae, per quas
mens quodammodo deambulat, munitae debent esse
contra insidias malignorum spirituum, ut praeparemus
in nobis ea quae jubet Evangelium pacis, id est,
Christi.
13. Galeam salutis . Salus aeterna debet esse nostra
galea, quia in memoria mentem nostram, quae capitis
nomine designatur, saepe debet obvolvere.
14. AUGUST. ( ibid. in psal. CXLIX.) Et gladium .
Sermo ergo Dei gladius bis acutus; unde bis acutus
dicit de temporalibus, dicit de aeternis. Gladius enim
bis acutus, de quo Apostolus dicit, quia de utroque
testamento feriens hoc gladio mactabant; de quibus
dicebatur Petro: Macta et manduca .
15. LANFR. Mysterium Evangelii . Mysterium
Evangelii, id est, quod Evangelium praedicat, incarnationem
et passionem Christi et caetera sacramenta
vult intelligere.
|
|