57. (1) DE COMMUTATIONE FIXI NON DIGNE POSITI.
(2) Si fixum non videbitur bene stare, tunc oportet illud callide permutari, ut si diceres ita simpliciter: 'Homines dicunt hoc factum', honestius ita dices: 'Hoc factum est vox populi. Fama publica testis est huius facti. (3) Huic facto nulla lingua reclamat. Hoc factum lingue omnium protestantur. O factum voce populi declaratum. In hoc facto sermones consonant singulorum'. Et sic caute potes in singulis iuncturas varias invenire.
58. (1) DE COMMUTATIONE ADVERBII IN NOMEN.
(2) Partem quoque indeclinabilem potes ad declinabilem retorquere, causa maioris faccundie vel hornatus, (3) ut si velis dicere: 'Hodie mecum cena', hoc adverbium in nomen taliter commutabis: 'Mecum in cena te dies societ hodierna. Ut dies ista sit michi iocundior mecum cena'. (4) Item si diceres: 'Veniet huc magister', adverbium locale retorqueas sic in nomen: 'Magistrum venientem suscipiet iste locus. Adventu magistri honorabitur iste locus'. (5) Item si ponas adverbium numerale, ut 'semel dixi', taliter illud vertas: 'Unica fuit emissio mei dicti'.