ut tu coniceris adstruere, aut rescindatur ab uno, hoc est
ab unione personae, ut demutetur in alterum, hoc est in nuncupatiuum
deum, ut tuum ueluti sepulchrum patens guttur intolerabilem
non erubuit exalare fetorem.
I 21 (I 21) Expergescere tandem aliquando, si funditus non es
defunctus, et a somno infidelitatis post tam tumultuoso euigila
pulsatus clamore. Quousque crapulatus perfidiae poculo ursina
stertere non desines nare? Iam enim hiemps transiit, imber abiit et
recessit. Egredere nunc de tenebrosi cauerna profundi. Flores apparuerunt
in terra, uox turturis audita est in terra nostra. Abiit coruus,
ut degat in ruinosis. Reuersa est iam columba pennis deargentata,
ferens ramum uirentis oliuae ad arcam. Memento quia ad uesperum
reuertitur, ne forte, dum tu somno grauaris perfidiae et surgere
pigritaris, ingrediatur arcam columba clausoque aforis ostio tu
euagare incipias errabundus post coruum. Cur non sentis, an si
sentis stupidus remanes, nimio quatiente terrore, quam terribiliter
prophetarum tonitrua ut expergescaris inter uolantes rorantesque
grassantis aeris nebulas altissimis strepere tumultibus non requiescunt,
caelique scripturarum spiritali in cardine quo uoluuntur
cantiloquis stridunt concentibus, dulcia grandisono carmina modolamine
cantant? An forte noxiali uitiatis oculis fumo et ob id
palpantibus palpebris, arcum in die pluuiae non uales depictum
in nube suspicere nec discurrentia euangeliorum fulmina coruscis
aquarios transfusos radiis nimbos nulla tibi datur cernendi facultas?
Nil ergo distas a mortuo, si haec omnia, quae dicuntur insensibilia
tibi uideri, ex tuis quantotius poterunt indiciis obiciendo probari.
Doceri nempe facillime poteras, si aurem praebere non recusabas
benignam.
I 22 (I 22) Non ut tibi uidetur hoc est 'adoptiuus' quod et
'adsumptus' seu 'adplicatus' uel cetera huiusmodi quae tuo stromatico
digesta stilo leguntur. Interrogo praeterea, si unum est
'adsumptus' et 'aduocatus', quomodo accipi rectae potest quod
|
|