Quem amavit speciali deus privilegio,
Nam crux eum agregavit cęlesti collegio.
Cosdroe tulit hoc lignum, quo nichil sacracius
Illudque recuperavit vir fortis Heraclius
Monomachice pugnando Cosdroe cum filio,
Cuius cephalum truncavit domini auxilio.
Alii imperatores triumphis magnifici
Hostibus erant feroces, subditis pacifici.
Cui placet perscrutari actiones talium,
Eas poterit nancisci in libris annalium.
Nam si litterę celassent res evi preteritas,
Quem, rogo, deberet sequi succedens posteritas?
Caruissent ratione homines ut pecora,
Nisi eos informassent sex aetatum tempora.
Bene habeant scriptores, qui faciunt vivere
Mortales post mille annos carne facta cinere;
Nam dum transit vita regum, in cartis non moritur,
Dum putatur defecisse, in melius oritur.
|
1
5
10
15
|