4. Nubes sacrata, quae pendens incubuit
deo iubente supra tabernaculi
tectum, beatus quod Moyses in eremo
fixit, precamur huius aule menia
afflata sancto perfundat spiramine.
5. Famosa dudum quae repleuit atria
templi dicati, nebula perlucida,
orante puro Salomone pectore,
hanc, Christe, caeli missa de cacumine
domum faecundet sempiterno munere.
6. Quicumque tuum sanctum nomen supplici
plenoque corde deprecatus fuerit
huius in aedis sancto domicilio,
te largiente, sit liber a crimine.
Exclude pestem, morbos omnes dilue.
7. Tuo sacrato hic depasti corpore
tuoque sancto satiati sanguine,
ab oste tuo defensi munimine
leti fideles fortiantur seruuli
uitae perennis sine fine gaudia.
8. Rerum creator, Iesu, patris unice,
mundum cruore saluas qui purpureo,
peccata tollis solus qui pestifera,
dignare tuos munere gratuito
ad astra caeli mittere ruriculas.
9. Sit semper alta deo patri gloria,
omnis potestas sit dilecto filio,
sanctoque semper gloria paraclito,
honor et uirtus, laus, decus, imperium
et nunc et ultra sit per cuncta saecula.
|
|