CAPITULUM XVIII
Post haec quidem beatus Christi confessor Symeon visitatis sanctorum
corporibus exinde rediens, per Britanniam transitum habuit, Thuronim
adiit, ibique beati Martini magni et incomparabilis viri oratorium
petiit. Ubi iam non multis transactis diebus, Italiam venit. Quam circumquaque
perlustrans, Mantuanae tandem provinciae confinia attigit,
ubi iuxta flumen Padum monasterium in honore almi patris Benedicti a
Theudaldo marchione Actonis filio constructum, ac probis fratrum
moribus digniter exornatum reperit, in quo sanctitatis conversatione Christo
duce sui corporis quietem elegit. Quem reverendus abbas Venerandus
nomine totaque fratrum religiosa congregatio summa cum charitate susceperunt,
sibique humile habitaculum iuxta sui competentiam, in loco
quem ipse elegerat, construxerunt.
|
|